766
ການໄດ້ພົບຄົນຮັກ ດັ່ງທີ່ໃຈປາຖະໜາ ກໍເປັນເໝືອນ ດັ່ງສະຫວັນມອບ ຂອງຂວັນໃຫ້ເຮົາ, ມີຫຼາຍຄູ່ຊີວິດ ທີ່ສາລະພາບວ່າ ສິ່ງສໍາຄັນທີ່ ຈະຊ່ວຍໃຫ້ ຄົນສອງຄົນ ທີ່ມາຈາກຕ່າງຄອບຄົວ ຕ່າງສະພາບແວດລ້ອມ ສາມາດມີຊີວິດຄູ່ ແບບມີຄວາມສຸກ ໄດ້ຢ່າງໝັ້ນຄົງ ແມ່ນອາໄສ ຄວາມຮ່ວມມື ຈາກທັງສອງຝ່າຍ ທີ່ຈະຮຽນຮູ້ ແລະ ປັບຕົວເຂົ້າຫາກັນ ສິ່ງສໍາຄັນ ທີ່ເປັນຂໍ້ຄິດ ອີກສ່ວນໜຶ່ງ ທີ່ຈະຊ່ວຍຮັກສາ ຄວາມສຳພັນ ຂອງຊີວິດຄູ່ ໃຫ້ເຂັ້ມແຂງ ແລະ ໝັ້ນຄົງນັ້ນ ປະກອບມີ:
-
ການຍອມຮັບກັນ ແລະ ກັນ ເປັນສິ່ງສໍາຄັນ ເບື້ອງຕົ້ນ ຂອງການໃຊ້ຊີວິດຄູ່ ຮ່ວມກັນ.
-
ຢ່າຄາດຫວັງວ່າ ຄູ່ຄອງຂອງທ່ານ ຈະສົມບູນແບບ.
-
ການມີເວລາໃຫ້ກັນ, ຈົ່ງໃຊ້ເວລາ ຢູ່ຮ່ວມກັນ ຢ່າງມີຄຸນຄ່າທີ່ສຸດ.
-
ການສື່ສານ: ຄວນໂອ້ລົມ ແລະ ສົນທະນາ ແລກປ່ຽນ ປະສົບການຊີວິດ ໃນແຕ່ລະມື້ ຮ່ວມກັນ.
-
ການໃຫ້ອະໄພເຊິ່ງກັນ ແລະ ກັນ.
-
ເພດສຳພັນໃນຊີວິດຄູ່: ຄູ່ຜົວເມຍ ຈໍາເປັນຕ້ອງຮຽນຮູ້ ຄວາມຕ້ອງການ ຂອງກັນ ແລະ ກັນ ຮູ້ວ່າ ຄູ່ຂອງເຮົາມັກ ຫຼື ບໍ່ມັກຫຍັງ ແລະ ແບບໃດ ທີ່ເຮັດໃຫ້ຄູ່ຮັກ ຂອງເຮົາມີຄວາມສຸກ.
-
ຮູ້ຈັກໜ້າທີ່, ມີຄວາມຮັບຜິດຊອບ ໃນຄອບຄົວ ແລະ ຊ່ວຍເຫຼືອກັນ ບໍ່ວ່າຍາມທຸກ ຫຼື ສຸກ ກໍໃຫ້ແບ່ງເບົາຊ່ວຍກັນ.
-
ຄວາມເຂົ້າໃຈ: ການລົມກັນ ແບບກົງໄປກົງມາ ຈະຊ່ວຍໃຫ້ ສະຖານະການ ດີຂຶ້ນ ເພາະຈະນໍາໄປສູ່ ການແກ້ໄຂ ແລະ ຕົກລົງ ບັນຫາຮ່ວມກັນ.
-
ການດູແລເບິ່ງແຍງ ເອົາໃຈໃສ່ເຊິ່ງກັນ ແລະ ກັນ ສະແດງໃຫ້ເຫັນ ເຖິງຄຸນຄ່າ ຂອງຄົນຮັກ ຢ່າງ ສະໝໍ່າສະເໝີ ຖືເປັນເລື່ອງ ສໍາຄັນ ເພາະຈະເປັນສິ່ງ ຫຼໍ່ລ້ຽງຈິດໃຈ ຂອງທັງສອງຝ່າຍ.
-
ບໍລິຫານການເງິນ: ຕັ້ງເປົ້າໝາຍ ແລະ ລົງມືເຮັດ ໃຫ້ເປົ້າໝາຍຊີວິດ ເປັນຈິງ ຮ່ວມກັບຄົນຮັກ ຂອງທ່ານ.
-
ການໃຫ້ບຸລິມະສິດ: ເຮັດໃຫ້ຄົນຮັກ ຮູ້ສຶກວ່າລາວ ເປັນຄົນສໍາຄັນ ອັນດັບໜຶ່ງ ຂອງທ່ານ, ໃຫ້ຄວາມເຄົາລົບ, ປະຕິບັດຕໍ່ກັນ ແບບໃຫ້ກຽດ ແລະ ສະແດງຄວາມຊົມເຊີຍ ຕໍ່ຄວາມສໍາເລັດ ຂອງກັນ ແລະ ກັນ, ຮູ້ຈັກເວລາ ສ່ວນຕົວ ຂອງກັນ, ສໍານຶກ ໃນບຸນຄຸນ ຂອງກັນ ແລະ ກັນ, ມີຄວາມເກງໃຈກັນ, ໃຫ້ອະໄພ ແລະ ປ່ອຍວາງ ໂດຍບໍ່ຕ້ອງ ເກັບກົດ ຫຼື ເກັບຄວາມຄຽດຂົມ ໄວ້ໃນໃຈ.