459
ການໃຊ້ຊີວິດ ໂດຍປາສະຈາກ ການວາງແຜນ ຖືເປັນຊີວິດ ທີ່ຂ້ອນຂ້າງສ່ຽງ ໂດຍສະເພາະ ໃນເລື່ອງການເງິນ ຖ້າບໍ່ມີ ການຈັດລະບົບໃຫ້ດີ ເມື່ອຮູ້ຕົວ ກໍອາດຈະສວາຍ ເກີນໄປ ເພາະການປະສົບກັບ ບັນຫາ ທາງການເງິນ ແບບຫຼີກບໍ່ໄດ້ ຕ້ອງຍອມຮັບວ່າ ຄົນເຮັດວຽກ ລໍຖ້າເງິນເດືອນນີ້ ສ່ວນໜຶ່ງຍັງບໍ່ສາມາດ ບໍລິຫານເງິນ ໄດ້ດີເທົ່າທີ່ຄວນ, ແຕ່ເຊື່ອວ່າ ເຮົາສາມາດ ຮັບມືກັບມັນໄດ້ ຖ້າຮູ້ ຈັກວາງແຜນ ແລະ ໃສ່ໃຈກັບ ອະນາຄົດ ທາງດ້ານການເງິນ ຂອງຕົນເອງ ໃຫ້ຫຼາຍຂຶ້ນ. ຖ້າໃນແຕ່ລະມື້ ມີຄ່າໃຊ້ຈ່າຍ ເພີ່ມຂຶ້ນເລື້ອຍໆ ຈົນບໍ່ຮູ້ວ່າຈະເລີ່ມ ຈາກຈຸດໃດດີ, ລອງມາອ່ານວິທີ ການວາງແຜນ ທ້ອນເງິນ ທີ່ບໍ່ຍາກເກີນ ຄວາມສາມາດ ຂອງທ່ານດັ່ງນີ້:
-
ຫຼຸດຄ່າໃຊ້ຈ່າຍທີ່ບໍ່ຈຳເປັນ: ຄົນເຮັດວຽກທຸກຄົນ ອາດຈະຮູ້ສຶກວ່າ ທຸກສິ່ງທຸກຢ່າງ ທີ່ຢູ່ອ້ອມຕົວເຮົາ ມັນເປັນສິ່ງທີ່ ຈຳເປັນທັງໝົດ ເຮັດໃຫ້ ຕັດສິນໃຈໄດ້ຍາກ ແຕ່ເມື່ອຮອດເວລາ ຕ້ອງວາງແຜນການເງິນ ເຮົາກໍຈະ ເຫັນໂລດວ່າ ສິ່ງໃດຈຳເປັນທີ່ສຸດ ຫຼື ບໍ່ຈໍາເປັນ ພໍເທົ່າໃດ ເຊັ່ນ: ກິນອາຫານລາຄາແພງ, ຊື້ເຄື່ອງນຸ່ງ ທີ່ໃຊ້ພຽງເທື່ອດຽວ, ຖ້າເຮົາສາມາດ ຄວບຄຸມຄ່າໃຊ້ຈ່າຍ ທີ່ບໍ່ຈຳເປັນໄດ້ ເຮົາກໍຈະເຫັນເງິນ ຢ່າງແນ່ນອນ.
-
ທ້ອນກ່ອນ ຈຶ່ງຈ່າຍ: ຫຼາຍຄົນເລືອກ ທີ່ຈະໃຊ້ຈ່າຍກ່ອນ ເຫຼືອເທົ່າໃດແລ້ວ ຈຶ່ງທ້ອນ ເຊິ່ງມັນອາດຈະ ບໍ່ແມ່ນວິທີ ທີ່ຖືກຕ້ອງປານໃດ, ເຮົາຄວນປ່ຽນ ມາໃຊ້ວິທີ ທ້ອນກ່ອນ ແລ້ວຈຶ່ງຈ່າຍ ຈະເຮັດໃຫ້ເຮົາ ມີເງິນເຫຼືອຫຼາຍຂຶ້ນ ເພາະເຮົາໄດ້ເອົາ ເງິນສ່ວນໜຶ່ງ ອອກໄປແລ້ວ ເຮົາກໍຈະໃຊ້ເງິນ ໄດ້ແບບອຸ່ນໃຈຫຼາຍຂຶ້ນ ເຮົາອາດຈະໃຊ້ ຮູບການເປີດ ບັນຊີເງິນຝາກປະຈຳ ເພື່ອຊ່ວຍທ້ອນເງິນ ໂດຍບໍ່ເອົາເງິນສ່ວນນີ້ ມາໃຊ້ຈ່າຍ ແລະ ເປັນການສ້າງນິດໄສ ການທ້ອນເງິນ ໃຫ້ກັບຕົນເອງ.
-
ຕັ້ງເປົ້າໝາຍໃນການທ້ອນເງິນ: ໃນໄລຍະທີ່ເຮົາເລີ່ມຕົ້ນ ທ້ອນເງິນ ໃຫ້ບັນທຶກລາຍຮັບ-ລາຍຈ່າຍນຳອີກ ເພື່ອໃຫ້ເຫັນວ່າ ໃນແຕ່ລະມື້ໄດ້ ຈ່າຍເງິນ ໄປເທົ່າໃດແລ້ວ ໃຫ້ເລີ່ມຕັ້ງເປົ້າ ໃນການທ້ອນເງິນ ໃຫ້ກັບຕົວເອງວ່າ ເຮົາຈະເອົາເງິນ ໄປຊື້ລົດ, ຊື້ເຮືອນ ຫຼື ທ່ອງທ່ຽວ ຕ່າງປະເທດ ແລະ ສຸດທ້າຍເຮົາ ກໍຈະຮູ້ວ່າ ເຮົາຈະມີຄວາມສຸກ ກັບການທ້ອນເງິນ ເປັນກ້ອນໄດ້.
-
ລົງທຶນບາງສ່ວນກັບກອງທຶນ: ຖ້າເຮົາມີ ເງິນທ້ອນບາງກ້ອນ ໃຫ້ລອງເອົາເງິນນັ້ນ ມາລົງທຶນກັບ ກອງທຶນຕ່າງໆ ຫຼື ປ່ອຍເງິນກູ້ ກິນດອກເບ້ຍ ແຕ່ກ່ອນຈະລົງທຶນ ເຮົາຕ້ອງສຶກສາຂໍ້ມູນ ໃຫ້ດີກ່ອນ ຄິດໄລ່ວ່າ ມັນຄຸ້ມແລ້ວບໍ່? ບໍ່ດັ່ງນັ້ນ, ອາດຈະເກີດບັນຫາ ນຳຫຼັງ ຕາມມາໄດ້ ການລົງທຶນນັ້ນ ແມ່ນ ລົງທຶນຕາມເງິນ ທີ່ເຮົາຈ່າຍໄດ້ ໂດຍບໍ່ໃຫ້ເດືອດຮ້ອນ ເງິນໃນສ່ວນນີ້ ບໍ່ໃຫ້ກ່ຽວກັບເງິນ ທີ່ເຮົາຈ່າຍໃນແຕ່ລະມື້ ດັ່ງນັ້ນ, ເຮົາອາດຈະພົບ ກັບບັນຫາ ຢ່າງແນ່ນອນ.