ບົດຄວາມທົ່ວໄປ ອົດຫິວ-ອຶດຫິວ ໃນພາສາລາວ ໂດຍ ຄໍາສັບລາວ 25/01/2023 703 ຄຳວ່າ: ອົດ ແລະ ອຶດ ໃນພາສາລາວ ມີຄວາມໝາຍທີ່ແຕກຕ່າງກັນຫຼາຍເຊັ່ນ ຄຳວ່າ: ອົດ ໝາຍເຖິງ ອາການກັ້ນຄວາມຕ້ອງການຈະເຮັດຈະສະແດງອອກ ເອົາໄວ້. ຕົວຢ່າງ: ອົດນອນ ໝາຍວ່າ ຢາກນອນແຕ່ບໍ່ໃຫ້ເກີດນອນ, ອົດຫົວ ໝາຍວ່າ ຢາກຫົວ ແຕ່ບໍ່ໃຫ້ເກີດຫົວ. ຄຳວ່າ: ອຶດ ໝາຍເຖິງອາການຫາໄດ້ຍາກ ຊອກໄດ້ຍາກ ມີໜ້ອຍເກີນປະລິມານ ຫຼື ຈຳນວນທີ່ຕ້ອງການ ເຊັ່ນ: ອຶດນ້ຳ, ອຶດເຂົ້າ, ອຶດເງິນ. ຄຳວ່າ ຫິວ /hiw/ ສຽງສັ້ນນັ້ນ ໃນພາສາລາວບໍ່ປະກົດມີ, ພົບແຕ່ຄຳວ່າ: ຫີວ /hi:w/ ດັ່ງຄຳວ່າ: ຫິວ ໃນພາສາລາວຈຶ່ງບໍ່ສາມາດຫາຄວາມແປ ແຕ່ຄຳວ່າ: ຫີວ ສາມາດຫາຄຳແປໄດ້ຄື: ອາການຢາກ ໂດຍສະເພາະແມ່ນ ອາຫານ ຫຼື ນ້ຳ ເຊັ່ນ: ຫີວເຂົ້າ, ຫີວນ້ຳ. ຄຳວ່າ ອຶດຫີວ ເປັນຄຳຮູບປະສົງດັງເດີມຂອງພາສາລາວ ມີຄວາມໝາຍວ່າ: ອາການຢາກກິນເພາະໄດ້ກິນບໍ່ພໍຕາມທີ່ຢາກ ຫຼື ຢາກແຕ່ບໍ່ໄດ້ກິນ. ເຮົາມາພາກັນໃຊ້ຄຳຕາມແບບ ທີ່ພາສາລາວເຮົາມີກໍ່ຈະດີກວ່າ. ຄຳວ່າ: ອົດຫີວ ໝາຍເຖິງອາການ ຕັ້ງໃຈກັ້ນຄວາມຢາກເອົາໄວ້. ເວົ້າແບບໜຶ່ງຄື: ປ່ອຍໃຫ້ຕົນເອງຫີວຢູ່ຢ່າງນັ້ນ, ຕັ້ງໃຈໃຫ້ຫີວໂດຍບໍ່ຍອມກິນ ເຊິ່ງອາຫານ ຫຼື ອັນກິນກໍ່ມີຫາກຕັ້ງອົດ. ອາການອົດຫີວມີຜູ້ໃຊ້ໄປໃນທາງວຽກບ້ານການເມືອງ, ໂດຍບຸກຄົນ ຫຼື ກຸ່ມຄົນໃດໜຶ່ງ ທີ່ມີຄວາມຂັດແຍ້ງທາງ ດ້ານການເມືອງ ຫຼື ອຸດົມການ ກັບກຸ່ມອຳນາດໜຶ່ງອີກ ເຊິ່ງໃຊ້ການອົດຫີວນີ້ ເປັນວິທີສະແດງຄວາມຄັດຄ້ານ ຫຼື ຕໍ່ສູ້. ຜູ້ທຳການອົດຫີວ ທີ່ໄດ້ເຮັດໃນຜ່ານມາ ພົບຫຼາຍກໍ່ຄືອົດເຂົ້າ ແລະ ອາຫານເປັນສຳຄັນ, ໜ້ອຍໜັກໜ້ອຍໜາ ຈະອົດຫີວທຸກຢ່າງນັບທັງນ້ຳ. ສະນັ້ນ, ໃນພາສາລາວ ຄຳວ່າ: ອຶດຫີວ ແລະ ອົດຫີວ ເຄີຍມີເຄີຍໃຊ້ ແຕ່ ອຶດຫີວ ມັນບໍ່ຄື ອົດຫີວ; ຄົນອຶດຫີວມີຫຼາຍກວ່າ ສ່ວນຄົນອົດຫີວມີບາງເທື່ອບາງທີ. ຮັກພາສາຂອງເຮົາ ພາສາລາວ 1 FacebookTwitterWhatsappLINEEmail ຂ່າວສານທີ່ກ່ຽວຂ້ອງ ບຸນປີໃໝ່ລາວ 10/04/2023 ຂີ້ເຫຍື້ອຢາງພລາດສະຕິກ ສາເຫດການເສື່ອມໂຊມ ຂອງສິ່ງແວດລ້ອມ 05/01/2023 ເມື່ອສິນຄ້າໝົດອາຍຸ ຖືກນໍາມາຂາຍ 29/08/2022 ແມ່ຍິງລາວກັບການຮັກສາມູນເຊື້ອ ເຮືອນ 3 ນໍ້າ 4 12/08/2022 ຄຳທີ່ກ່ຽວກັບ ການເບິ່ງ ໃນພາສາລາວ 20/06/2022 ອັນຕະລາຍຈາກມົນລະພິດທາງອາກາດ 10/06/2022 ຄ່າຄອງຊີບສູງສົ່ງຜົນກະທົບຕໍ່ການໃຊ້ຊີວິດປະຈໍາວັນ 27/05/2022 ແຍກກ່ອນຖິ້ມເພື່ອສິ່ງແວດລ້ອມທີ່ຍືນຍົງ 29/04/2022 ເລື່ອງຂອງຄຳ: ໂມຍ-ມວຍ ໃນພາສາລາວ 10/01/2022 ຍ້ອນມືຖື ຫຼື ເຟສບຸກ 21/12/2021