ຝົນທັ່ງໃຫ້ເປັນເຂັມ

ທັ່ງເປັນເຫຼັກແຂງແກ່ນເປັນແທ່ງ ມີທັງແທ່ງນ້ອຍແທ່ງໃຫຍ່ ແລ້ວແຕ່ການນຳໃຊ້ ເຊິ່ງເພີ່ນໃຊ້ທັ່ງ ຕີລົງໃນແກ່ນກາງ ຂອງທ່ອນໄມ້ ໃຫ້ເປັນໜ້າຮາບພຽງ ເພື່ອໃຊ້ຮອງຕີມີດຕີພາ ເພີ່ນເອີ້ນວ່າ ເຫຼັກຄ້ອນທັ່ງ. ການທີ່ຈະເອົາ ທັ່ງມາຝົນໃຫ້ເປັນເຂັມນັ້ນ ຕ້ອງໃຊ້ເວລາດົນ ສິ່ງສຳຄັນຕ້ອງມີຄວາມຂະຫຍັນ ອົດທົນຝົນກວ່າທັ່ງ ຈະກາຍເປັນເຂັມໄດ້. ດັ່ງນັ້ນ, ຄຳໂຕງໂຕຍນີ້ ຈຶ່ງໝາຍເຖິງ ຄວາມອົດທົນພະຍາຍາມ ເຮັດວຽກເທື່ອລະໜ້ອຍ ໃຫ້ຈົນສຳເລັດຜົນ ຄືດັ່ງນ້ຳຝົນແຕ່ລະຢາດ ທີ່ຍ້ອຍຕົກໃສ່ຫີນ ແສນເທື່ອຈົນຫ້ຽນເຂົ້າ.

(ຫຸມພັນ, 2007:38)