ນ້ຳຂຶ້ນໃຫ້ຮີບຕັກ

ມື້ນີ້ ພວກເຮົາຄຳສັບລາວ ຈະມາອະທິບາຍ ຄວາມໝາຍ ຂອງ ຄຳໂຕງໂຕຍ ທີ່ວ່າ “ນ້ຳຂຶ້ນໃຫ້ຮີບຕັກ” ຊຶ່ງຈະໝາຍເຖິງ ຄວາມໝາຍແນວໃດນັ້ນ ພວກເຮົາໄປເບີ່ງ ນຳກັນເລີຍ!!!

ຂຶ້ນ: ໝາຍເຖິງ ເຄື່ອນຈາກບ່ອນຕ່ຳ ໄປຫາບ່ອນສູງ, ກຳລັງປົ່ງ. ຕັກ: ໝາຍເຖິງ ເອົາພາສະນະ ຊວ້ານ ສິ່ງຂອງຂຶ້ນ ຈາກບ່ອນເດີມ. ດັ່ງນັ້ນ, ຄຳໂຕງໂຕຍ “ນ້ຳຂຶ້ນໃຫ້ຮີບຕັກ” ໝາຍເຖິງ ໂອກາດດີ ທີ່ຜ່ານເຂົ້າມາໃນຊີວິດເຮົາ ໃຫ້ຮີບຟ້າວເຮັດ ຟ້າວສວຍ ໂອກາດ ແລະ ເກັບກ່ຽວຜົນປະໂຫຍດ ໄວ້ຢ່າງເຕັມທີ່ ກ່ອນທີ່ໄລຍະ ເວລາດີໆ ຈະຜ່ານໄປ. ປຽບທຽບເຖິງ ສະໄໝບູຮານ ທີ່ອາໄສ ນ້ຳຂອງ, ນ້ຳເຊ, ຫ້ວຍ ແລະ ແຫຼ່ງນ້ຳຕ່າງໆ ເພື່ອເກັບນ້ຳໄວ້ ນຳໃຊ້ເຂົ້າໃນ ຄົວເຮືອນ, ໄວ້ດື່ມ, ໄວ້ໃຊ້. ທຳມະຊາດ ຂອງນ້ຳ ກໍມີໄລຍະນ້ຳຂຶ້ນ ແລະ ນ້ຳລົງ ຫາກເວລານ້ຳຂຶ້ນ ກໍໃຫ້ຮີບຟ້າວ ຕັກນ້ຳ ມາຕຸນໄວ້ ເນື່ອງຈາກເວລາ ນ້ຳລົງ ຈະເຮັດໃຫ້ຕັກນ້ຳ ໄດ້ລຳບາກກວ່າ. ໃນອີກຄວາມໝາຍໜຶ່ງ ເວົ້າເຖິງ ຄວາມຮັກມັກ ລະຫວ່າງ ບ່າວ-ສາວ ເມື່ອເວລາ ຝ່າຍໃດ ຝ່າຍໜຶ່ງ ຫາກມີຄວາມພ້ອມ ໃຫ້ຮີບຕັດສິນໃຈ ບໍ່ດັ່ງນັ້ນ ໂອກາດດີໆ ອາດຈະໝົດໄປ ອາດບໍ່ສາມາດ ໄດ້ຮັບຕາມ ຄວາມຕ້ອງການ ຂອງຕົນໄດ້.

(ທອງມີ, 2007:176)