ການຄ້າມະນຸດ ແຝງມານໍາການ ແຕ່ງດອງ ເປັນສິ່ງໜຶ່ງ ທີ່ທ້າທາຍ ໃນສັງຄົມ

ແມ່ຍິງລາວ ແຕ່ງດອງ ກັບ ຄົນຕ່າງປະເທດ ໂດຍສະເພາະ ສາວລາວ ແຕ່ງດອງ ກັບ ບ່າວ ຄົນຈີນແລ້ວພາກັນ ເດີນທາງ ໄປປະເທດຈີນ ຂ່າວດັ່ງກ່າວ ແມ່ນເກີດຂຶ້ນກັບ ຄົນໃກ້ຕົວ ຂອງຜູ້ຂຽນເອງ ຢູ່ແຂວງ ອຸດົມໄຊ ແລະ ຍັງມີ ຫຼາຍແຂວງ ທີ່ເກີດເຫດການນີ້ ເຊັ່ນດຽວກັນ, ແຕ່ສິ່ງທີ່ ໜ້າເປັນຫ່ວງ ກໍຄື: ເມື່ອໄດ້ຕັດສິນໃຈ ແຕ່ງດອງກັບ ບ່າວຈີນແລ້ວ ຜົວຄົນຈີນ ໄດ້ພາຜູ້ເປັນເມຍ ຫຼື ຄົນຮັກ ຂອງຕົນໄປເມືອງຈີນ ອ້າງວ່າ ພາເມືອຢາມ ບ້ານເກີດ, ໄປຢາມພໍ່ແມ່ ຍາດພີ່ນ້ອງ ຂອງຜົວ ຫຼື ໄປຫາເງິນຢູ່ຈີນ ມັນສະດວກສະບາຍ ໄດ້ເງິນຫຼາຍ. ແຕ່ກົງກັນຂ້າມ ເມື່ອໄປຮອດ ຈີນແລ້ວ ພັດຖືກ ຕົວະ, ຂົ່ມຂູ່, ທາລຸນ ໃຫ້ຂາຍຕົວ ຖ້າຂັດຂືນ ກໍຈະຫາຍຕົວໄປ ໂດຍບໍ່ທັນຕັ້ງຕົວ ດ້ວຍວິທີການ ແລະ ຮູບການຕ່າງໆ ເຫດການນີ້ ພວກເຮົາມັັກ ຮູ້ຈາກຄົນ ອ້ອມຂ້າງ ຫຼື ບາງຄົນມັກເຫັນ ໃນສື່ອອນລາຍ ຢ່າງແຜ່ລາຍ ແລະ ປະກົດມີ ຢ່າງລຽນຕິດ.

ດັ່ງທີ່ພວກເຮົາຮູ້ ນໍາກັນແລ້ວວ່າ: ຄົນລາວເປັນ ຄົນສັດຊື່, ຈິງໃຈ, ການດໍາລົງຊີວິດ ຢູ່ເຂດຫ່າງໄກ ສອກຫຼີກ ສ່ວນຫຼາຍ ຍັງຂ້ອນຂ້າງ ທຸກຍາກ, ການຊອກຢູ່ຫາກິນ ຍັງຕິດພັນກັບ ທໍາມະຊາດ ພື້ນຖານ ວັດທະນະທໍາ ຮີດຄອງ ປະເພນີ ລຽບງ່າຍ ຊື່ກົງ ເມື່ອພົບເຫັນ ຄົນຕ່າງດ້າວ ທ້າວຕ່າງແດນ ກໍສັດທາຫຼົງໄຫຼ ໄມຕີຈິດ ເຂົ້າໃຈວ່າ ເປັນຄົນມີສິນທໍາ, ເຂົາເວົ້າຫຍັງກໍເຊື່ອ ເພາະຄົນສະໄໝນີ້ ຮູ້ໜ້າບໍ່ຮູ້ໃຈ ຈາກນັ້ນກໍ ຫຼົງເຊື່ອໃຈ ໃຫ້ຄວາມຜູກພັນ ຈົນກໍ່ໃຫ້ເກີດ ເປັນຄວາມຮັກ ແລະ ສ້າງຄອບຄົວ ຮ່ວມກັນ ດ້ວຍຄວາມຮັກ ແລະ ຫວັງຈະໃຫ້ຄອບຄົວ ຫຼຸດພົ້ນ ອອກຈາກ ຄວາມທຸກຍາກ ເມື່ອຮູ້ຕົວ ວ່າຕົນເອງໄດ້ ຫຼົງຜິດ ມັນກໍສວາຍ ເກີນໄປແລ້ວ.

ເວົ້າເຖິງຄົນລາວ ແຕ່ງດອງກັບ ຄົນຕ່າງປະເທດ ກໍບໍ່ໄດ້ມີແຕ່ ສະເພາະຄົນຈີນ ຍັງມີຫຼາຍ ປະເທດ ເປັນຕົ້ນແຕ່ງດອງກັບ ຄົນຝຣັງ, ອັງກິດ, ອາເມຣິກາ, ເຢຍລະມັນ, ໄທ, ຫວຽດນາມ, ກໍາປູເຈຍ, ຍີ່ປຸ່ນ, ເກົາຫຼີ ແລະ ປະເທດອື່ນໆ… ທີ່ແຕ່ງດອງໄປແລ້ວ ກໍສ້າງຄອບຄົວ ທີ່ມີຄວາມສຸກ, ຄວາມອົບອຸ່ນ, ເປັນພົນລະເມືອງດີ ປະຕິບັດກົດໝາຍ ຂອງປະເທດ ຢ່າງຖືກຕ້ອງ. ແຕ່ມີບາງຈໍານວນ ແຕ່ງດອງ ໂດຍບໍ່ປະຕິບັດຕາມ ກົດໝາຍບ້ານເມືອງ, ມີແຕ່ເອົາເງິນ ມາໃຫ້ແລ້ວ ໄປຢູ່ຮ່ວມກັນເລີຍ, ບາງຄົນໄປມາຫາສູ່ກັນ ໂດຍບໍ່ໃຫ້ຜູ້ປົກຄອງ ຮູ້ນໍາກໍມີ ເມື່ອຕົກລົງ ປົງໃຈແລ້ວ ກໍຕິດຕາມ ໄປນໍາເຂົາ ສຸດທ້າຍ ພໍເກີດບັນຫາກໍເຮັດ ໃຫ້ຕົນເອງ ຖອນໂຕບໍ່ໄດ້ແລ້ວ ຍິ່ງໄປກວ່າ ນັ້ນບາງລາຍ ກໍເສຍຊີວິດ ຫຼື ສູນຫາຍໄປ ໃນທີ່ສຸດກໍຕົກຢູ່ໃນ ເຄືອຂ່າຍ ການຄ້າມະນຸດ.

ໃນຍຸກໂລກາພິວັດ ຍຸກແຫ່ງຂໍ້ມູນຂ່າວສານ ທີ່ທັນສະໄໝ ກໍຄື ຍຸກແຫ່ງການ ພັດທະນາ ຄືທຸກມື້ນີ້ ແມ່ຍິງເຮົາ ຄວນມີສະຕິ ລະວັງຕົວ ໃຫ້ຫຼາຍຂຶ້ນ ເພື່ອຄວາມປອດໄພ ໃນຊີວິດ ຈາກພວກ ບໍ່ຫວັງດີ ທີ່ຈະເຂົ້າມາ ຫຼອກລໍ້ ໃຫ້ເຮົາໄປພົບກັບ ຈຸດຈົບທີ່ບໍ່ດີ. ແຕ່ເຖິງຢ່າງໃດກໍຕາມ ມັນກໍຂຶ້ນກັບ ຫຼາຍປັດໄຈ ແລະ ເງື່ອນໄຂ ອັນຫຼັກໆ ແມ່ນໃຫ້ ປະຕິບັດຕາມ ລະບຽບກົດໝາຍ ຂອງບ້ານເມືອງ, ຕ້ອງຮູ້ປະຫວັດ ທີ່ໄປທີ່ມາ ຂອງຄົນຢ່າງຈະແຈ້ງ, ວິຊາອາຊີບ ທີ່ໝັ້ນຄົງ ເພື່ອຮັບປະກັນ ຄວາມປອດໄພ ຕໍ່ຊີວິດ, ສ້າງຄອບຄົວ ໃຫ້ມີຄວາມອົບອຸ່ນ ຜາສຸກ ຖືກຕ້ອງ ຕາມຮີດຄອງ ປະເພນີ ແລະ ຕາມແນວທາງ ນະໂຍບາຍຂອງພັກ ແລະ ລັດຖະບານ ວາງອອກ. ສິ່ງສໍາຄັນ ເຮົາຄວນມີ ສິນທໍາຍຶດໝັ້ນ ຕໍ່ອຸດົມການ ຂອງຕົນເອງບໍ່ໂລເລໃຈງ່າຍ, ດຸໝັ່ນ ຊອກຢູ່ຫາກິນ ຮູ້ຈັກເພິ່ງຕົນເອງ ໃຫ້ໄດ້ຫຼາຍທີ່ສຸດ ແລ້ວຈະເຮັດໃຫ້ ເຮົາປອດໄພຈາກກຸ່ມຄົນ ບໍ່ຫວັງດີ.

ໂດຍ: ພອຍໄພລິນ