818
ມີບາງກຸ່ມຄົນ ທີ່ມີພຶດຕິກໍາໃນການກັ້ນຍ່ຽວ ແລະ ຖ່າຍໜັກ ໂດຍສະເພາະ ຜູ້ທີ່ນັ່ງເຮັດວຽກຢູ່ ໜ້າຄອມພິວເຕີ, ເຮັດວຽກກ່ຽວກັບການບໍລິການ, ຜູ້ທີ່ຕ້ອງໄດ້ເດີນທາງຢູ່ຕະຫຼອດ ແລ້ວບໍ່ສະດວກເຂົ້າຫ້ອງນໍ້າ ເຮັດໃຫ້ມີພຶດຕິກໍາກັ້ນຍ່ຽວ, ກັ້ນຖ່າຍໜັກ ຊຶ່ງບໍ່ຕ່າງຈາກການຝຶກພຶດຕິກໍາ ທໍາຮ້າຍສຸຂະພາບຕົນເອງ. ໃຜທີ່ມັກກັ້ນຖ່າຍໜັກ ບໍ່ວ່າຈະດ້ວຍຄວາມຈໍາເປັນ ຫຼື ຄວາມເຄີຍຊິນ ລະວັງອາດຈະມີຄວາມສ່ຽງດັ່ງນີ້:
-
ຕິດນິດໄສຖ່າຍບໍ່ເປັນເວລາ: ເວລາຮູ້ສຶກປວດຖ່າຍ ແຕ່ບໍ່ຍອມໄປຖ່າຍ ກໍຄືເສຍໂອກາດໃນຕອນທີ່ລໍາໄສ້ ພ້ອມບີບຕົວຖ່າຍ ຂອງເສຍອອກມາ ຈົນໃນທີ່ສຸດອາດຈະບໍ່ໄດ້ຖ່າຍ ໃນມື້ນັ້ນ. ຖ້າເຮົາກັ້ນຖ່າຍປະຈໍາຮ່າງກາຍອາດຈະຮຽນຮູ້ວ່າ ບໍ່ຢາກຖ່າຍ ເຮັດໃຫ້ລະບົບຖ່າຍໜັກ ຖ່າຍບໍ່ເປັນເວລາ;
-
ຮ່າງກາຍສະສົມອາຈົມໄວ້ໃນຮ່າງກາຍ: ຖ້າບໍ່ຖ່າຍອອກມາ ຮ່າງກາຍຈະດູດເອົານໍ້າ ໃນອາຈົມກັບໄປ ໝູນໃຊ້ໃນຮ່າງກາຍ ຊຶ່ງເທົ່າກັບວ່າ ການກັ້ນຖ່າຍ ແມ່ນການເຮັດໃຫ້ ສານພິດຕົກຄ້າງ ຢູ່ໃນຮ່າງກາຍໄດ້ງ່າຍ ລວມທັງເຮັດໃຫ້ກ້ອນອາຈົມແຂງ ເວລາຖ່າຍອອກ ກໍຈະທໍລະມານ ເພາະຖ່າຍຍາກທີ່ສຸດ ຈົນຮ່າງກາຍ ບໍ່ສາມາດຖ່າຍອອກມາໄດ້ ສົ່ງຜົນເຮັດໃຫ້ມີອາການ ຖ່າຍແຂ້ນຊໍາເຮື້ອເປັນເວລາດົນ;
-
ອ່ອນເພຍ, ປຸ້ນທ້ອງ ບໍ່ເບີກບານ: ຖ້າຮ່າງກາຍດູດນໍ້າໃນອາຈົມ ກັບໄປນໍາໃຊ້ ສານພິດຕົກຄ້າງຕ່າງໆ ລວມທັງເຊື້ອພະຍາດ ອາດໄປເຮັດໃຫ້ຮ່າງກາຍ ຮູ້ສຶກເມື່ອຍ, ອ່ອນເພຍ ຈາກອາການອຶດອັດທ້ອງ ຍ້ອນບໍ່ໄດ້ຖ່າຍ;
-
ລິດສີດວງທະວານໜັກ: ອາຈົມແຂງຕົວ ຍ້ອນເຫຼືອນໍ້າໜ້ອຍ ເປັນສາເຫດເຮັດໃຫ້ ເກີດພະຍາດ ລິດສີດວງທະວານໜັກໄດ້ງ່າຍ ຖ້າຫາກມີອາການຖ່າຍຍາກ ຈົນເຮັດໃຫ້ຮູທະວານ ຈີກຕະຫຼອດ ອາດເຮັດໃຫ້ຊີ້ນ ທາງໃນທະວານໜັກ ເກີດບາດຈົນມີ ເລືອດອອກ ມາທາງນອກ.
ການກັ້ນຖ່າຍໜັກຈົນເປັນນິດໄສ ສົ່ງຜົນກະທົບຕໍ່ ສຸຂະພາບໄດ້ຫຼາຍຢ່າງ. ດັ່ງນັ້ນ ຖ້າຫາກປວດຖ່າຍໜັກຕອນໃດ ຢ່າກັ້ນໄວ້ດົນ ຮີບໄປຖ່າຍອອກ ໂດຍໄວ ເພື່ອໃຫ້ກົນໄກຕ່າງໆ ຂອງຮ່າງກາຍ ເຮັດວຽກໄດ້ຢ່າງມີ ປະສິດທິພາບ ຈະດີທີ່ສຸດ ໂດຍເລີ່ມຈາກການປັບ ພຶດຕິກໍາຕົນເອງກ່ອນ ດັ່ງນີ້:
-
ຝຶກໃຫ້ຕົນເອງນັ່ງຖ່າຍເປັນເວລາເຊັ່ນ: ຕື່ນນອນມາ ຫຼື ກິນເຂົ້າເຊົ້າແລ້ວ ຄວນນັ່ງຖ່າຍກ່ອນ;
-
ດື່ມນໍ້າຫຼາຍໆ ເພື່ອຊ່ວຍດັນຂອງເສດເຫຼືອເກົ່າໃຫ້ອອກມາງ່າຍຂຶ້ນ;
-
ໝັ່ນອອກກໍາລັງກາຍ ເພື່ອເພີ່ມການເຄື່ອນຕົວຂອງລໍາໄສ້ ຊ່ວຍໃຫ້ຖ່າຍໄດ້ງ່າຍຂຶ້ນ;
-
ປວດຖ່າຍເມື່ອໃດໃຫ້ຮີບໄປຖ່າຍໃຫ້ທັນການ ຢ່າກັ້ນຖ່າຍເດັດຂາດ.