ກະຕ່າຍຕື່ນໝາກຕູມ

ຄຳໂຕງໂຕຍນີ້ ມີຄວາມໝາຍວ່າ ກ່ອນຈະເຊື່ອໃນສິ່ງໃດສິ່ງໜຶ່ງ ຕ້ອງໄດ້ມີການ ຄົ້ນຄຶດ ຕຶກຕອງ ຫາເຫດຜົນກ່ອນ ຈິ່ງບໍ່ພາຕົນເອງ ແລະ ຄົນອື່ນ ມີຄວາມເດືອດຮ້ອນ. ດັ່ງ ກະຕ່າຍ ທີ່ບໍ່ເບິ່ງ ບັນຫາຄັກແນ່, ໄດ້ຍິນໝາກຕູມຫຼົ່ນລົງໃສ່ ກໍຄິດວ່າແມ່ນແຜ່ນດິນໄຫວ. ດັ່ງ ນິທານທີ່ວ່າ ກະຕ່າຍ ຕື່ນຈາກນອນ ທັງຫຼັບທັງຝັນ ແລ່ນປົບໜີ ຄິດວ່າແຜ່ນດິນໄຫວ ພ້ອມທັງ ສະແດງອາການ ຕື່ນຕົກໃຈ, ເຮັດໃຫ້ຝູງສັດທັງຫຼາຍ ແຕກຕື່ນໄປນຳກັນ ເມື່ອລາຊະສີຮູ້ ກໍມາຖາມເຖິງ ກົກປາຍສາເຫດ ຄວາມຈິງທີ່ເກີດຂຶ້ນ ແລ້ວກໍພາກັນໄປ ບ່ອນຕົ້ນເຫດ, ບໍ່ເຫັນແຜ່ນດິນໄຫວ ເຫັນແຕ່ໝາກຕູມ ຕົກຫຼົ່ນຢູ່ ຈິ່ງສັ່ງສອນ ສັດທັງຫຼາຍ ໃຫ້ພິຈາລະນາ ກ່ອນຈະເຊື່ອສິ່ງໃດ ຢ່າເຮັດຫູເບົາ ເອົາໃຈງ່າຍ ດັ່ງ ກະຕ່າຍຕື່ນໝາກຕູມ.

(ຫຸມພັນ, 2007:ກ)