1.1K
ຫຼາຍປີທີ່ຜ່ານມາ ທຸກຄົນ ອາດຈະເຄີຍໄດ້ຍິນ ຄຳວ່າ: Blockchain ຖ້າແປເປັນລາວທີ່ເຂົ້າໃຈ ງ່າຍໆ ກໍແມ່ນ “ກຸ່ມຂໍ້ມູນຜູກພັນ”, ເຊິ່ງເປັນ ເຕັກໂນໂລຊີ ທີ່ຄົນສ່ວນໃຫຍ່ ໃນວົງການໄອທີ ແລະ ວົງການ ການເງິນ ໃຫ້ຄວາມສົນໃຈຫຼາຍ ເພາະຄິດວ່າ ເຕັກໂນໂລຊີນີ້ ຈະມາປະຕິວັດ ອຸດສາຫະກຳການເງິນຂອງໂລກ ໂດຍສະເພາະ ແມ່ນການເຮັດ ທຸລະກຳອອນລາຍ ແລະ ສະກຸນເງິນດິຈິຕອນ (Crypto currency) ເຊິ່ງຈະເປັນໃນຮູບແບບ ຊັບສິນດິຈິຕ໋ອນ (Digital Asset).
ຄຳວ່າ: ກຸ່ມຂໍ້ມູນຜູກພັນ (Blockchain) ເປັນຄຳສັບ ເຕັກນິກວິຊາການໄອທີ ບໍ່ແມ່ນຄຳສັບ ສຳລັບຜູ້ໃຊ້ທົ່ວໄປ.
ໜຶ່ງໃນເຫດຜົນ ທີ່ເຮັດໃຫ້ຄົນສ່ວນໃຫຍ່ ບໍ່ເຂົ້າໃຈ ຄຳວ່າ Blockchain ຍ້ອນວ່າ ມັນເປັນ ຄຳສັບ ເຕັກນິກທາງ ວິຊາການໄອທີ ເປັນລະບົບ ໂຄງລ່າງພື້ນຖານ ທີ່ນິຍົມໃນຕອນນີ້ ໃນການ ຮອງຮັບ ບັນດາ ຊັບສິນດິຈິຕ໋ອນ (Digital Asset) ຕ່າງໆ ເທິງໂລກອອນລາຍ.
ຄຳວ່າ ກຸ່ມຂໍ້ມູນຜູກພັນ (Blockchain) ແມ່ນ ຮູບແບບການເກັບຂໍ້ມູນ (Database) ແບບໜຶ່ງ ຂອງລະບົບທີ່ບໍ່ມີສູນກາງ ທີ່ໜ້າເຊື່ອຖື ແລະ ປອດໄພສູງ.
ຖ້າເຮົາເບິ່ງແລ້ວ ການໃຫ້ນິຍາມ ຄຳວ່າ Blockchain ນີ້ ສ່ວນຫຼາຍ ຈະອອກແນວ ເຕັກນິກທາງ ວິຊາການໄອທີ ຫຼາຍກວ່າ ເຮັດໃຫ້ເຂົ້າໃຈຍາກ ສຳລັບ ຄົນທົ່ວໄປ, ດັ່ງນັ້ນ ຖ້າເຮົາເວົ້າແບບ ພາສາຄົນທົ່ວໄປ ເຂົ້າໃຈໄດ້ງ່າຍ ໂດຍບໍ່ໃຊ້ ຄຳສັບ ເຕັກນິກທາງ ວິຊາການໄອທີ ເຂົ້າມາ ກໍຈະເປັນ:
ຄຳວ່າ ກຸ່ມຂໍ້ມູນຜູກພັນ (Blockchain) ແມ່ນ ການທີ່ໃຫ້ທຸກຄົນ ຖືເອກະສານຊຸດດຽວກັນ ເມື່ອມີການປັບປຸງແກ້ໄຂເອກະສານ ທຸກຄົນກໍຈະແກ້ໄຂປັບປຸງ ເອກະສານ ນຳກັນໝົດ ໃຫ້ເປັນຊຸດຂໍ້ມູນດຽວກັນ, ໂດຍທີ່ເຮົາໝັ່ນໃຈໄດ້ວ່າ ເອກະສານ ເຫຼົ່ານີ້ ເຊື່ອຖືໄດ້ແນ່ນອນ ບໍ່ມີການປອມແປງເອກະສານ.
Blockchain ບໍ່ແມ່ນ ບິດຄອຍ (Bitcoin)
ຫຼາຍຄົນ ອາດຈະເຂົ້າໃຈ ວ່າ Blockchain ກັບ ບິດຄອຍ (Bitcoin) ແມ່ນອັນດຽວກັນ, ແຕ່ຄວາມເປັນຈິງແລ້ວ Blockchain ກັບ ບິດຄອຍ (Bitcoin) ມັນເປັນຄົນລະຢ່າງ ແຕ່ມັນກ່ຽວຂ້ອງເຊິ່ງກັນ ແລະ ກັນ.
ເພື່ອບໍ່ໃຫ້ເກີດ ຄວາມສັບສົນ ຈະມາອະທິບາຍ ກ່ຽວກັບ ຄວາມແຕກຕ່າງ ລະຫວ່າງ ບິດຄອຍ (Bitcoin) ແລະ Blockchain ມີຄືແນວໃດ ?
ບິດຄອຍ (Bitcoin) ແມ່ນສະກຸນເງິນດິຈິຕ໋ອນ ຊະນິດໜຶ່ງ ທີ່ນອນຢູ່ໃນ ຊັບສິນດິຈິຕ໋ອນ (Digital Asset) ເທິງໂລກອອນລາຍ ທີ່ເຮົາສາມາດ ເຮັດທຸລະກຳ, ຊື້ຂາຍ ແລກປ່ຽນ ໄດ້ໃນໂລກ ອອນລາຍ, ການທີ່ຈະໄດ້ມາ ຂອງ ບິດຄອຍ (Bitcoin) ນີ້ ແມ່ນໄດ້ມາຈາກ ການເອົາ ເງິນແທ້ ໄປຊື້ມາ ຈາກເວັບໄຊຫຼືບໍລິສັດ ທີ່ເຂົາເປີດຂາຍ ແລະ ໄດ້ຈາກການຂຸດຄົ້ນ ບິດຄອຍ (Bitcoin) ດ້ວຍການນໍາໃຊ້ລະບົບຄອມພີວເຕີ ສະເພາະ.
ລາຄາຂອງ ບິດຄອຍ (Bitcoin) ແມ່ນມີການ ຂຶ້ນລົງ ຕາມລາຄາຕະຫຼາດຊື້ຂາຍ ດັ່ງນັ້ນ ຜູ້ໃດທີ່ສົນໃຈ ຄວນສຶກສາໃຫ້ດີ ສຳລັບ ການລົງທຶນແບບນີ້.
ຕົວຢ່າງ: ຖ້າຕອນນີ້ ລາຄາ 1 Bitcoin ມີມູນຄ່າ ເທົ່າກັບ 20.000 ໂດລາ, ເຮົາກໍສາມາດ ເອົາເງິນແທ້ 20.000 ໂດລາ ເຂົ້າໄປຊື້ Bitcoin ຈາກເວັບໄຊ ຫຼື ບໍລິສັດທີ່ເປີດຂາຍ ໃຫ້ເຮົາສາມາດຊື້ໄດ້ ແລະ ເຮົາກໍຈະໄດ້ເງິນ 1 Bitcoin ມາ ໃນຮູບແບບ ດິຈິຕ໋ອນ ທີ່ບໍ່ສາມາດຈັບບາຍໄດ້ ແຕ່ມີມູນຄ່າ. ແລະ ຖ້າເຮົາປະໄວ້ ໃນໄລຍະໜຶ່ງ ລາຄາຂອງ Bitcoin ອາດຈະ ເພີ່ມຂຶ້ນຕາມຕະຫຼາດຊື້ຂາຍ ອາດຈະເປັນ 1 Bitcoin ມີມູນຄ່າ ເທົ່າກັບ 30.000 ໂດລາ, ເຮົາກໍສາມາດ ເອົາ Bitcoin ທີ່ເຮົາມີຢູ່ ໄປຂາຍ ແລະ ເຮົາກໍຈະໄດ້ ເງິນແທ້ມາ 30.000 ໂດລາ.
ຖ້າເບິ່ງ ຕົວຢ່າງ ແລ້ວ ກໍຈະເຂົ້າໃຈໄດ້ວ່າ ບິດຄອຍ (Bitcoin) ມັນຄ້າຍຄືກັບ ຄຳ ທີ່ມີລາຄາຂຶ້ນລົງ ຕາມ ຕະຫຼາດຄຳ.
ຖ້າເວົ້າງ່າຍໆ ກໍແມ່ນ ບິດຄອຍ (Bitcoin) ແມ່ນ ສະກຸນເງິນດິຈິຕ໋ອນ ຮູບແບບໜຶ່ງ ທີ່ບໍ່ສາມາດ ຈັບບາຍໄດ້ ແຕ່ມີມູນຄ່າ ແລະ ການເຮັດວຽກຂອງມັນທຸກຢ່າງ (ການເຮັດທຸລະກຳ, ຊື້ຂາຍ ແລກປ່ຽນ) ຈະຢູ່ໃນຮູບແບບ ດິຈິຕ໋ອນ.
Blockchain ແມ່ນເຕັກໂນໂລຊີ ທີ່ຢູ່ເບື້ອງຫຼັງຂອງລະບົບ ບິດຄອຍ (Bitcoin)
ຖ້າຈະໃຫ້ເຂົ້າໃຈ ງ່າຍໆ ກໍຄື Blockchain ປຽບເໝືອນກັບ ປັກໄຟ ທີ່ຢູ່ເບື້ອງຫຼັງ ຂອງ ຫຼອດໄຟ, ແຕ່ ຫຼອດໄຟ ຕ້ອງໄດ້ອາໄສ ປັກໄຟ ໃນການເຮັດວຽກ ໃຫ້ ແສງສະຫວ່າງ.
ສະຫຼຸບງ່າຍໆຄື: ບິດຄອຍ (Bitcoin) ແລະ Blockchain ເປັນຄົນລະອັນກັນ ໂດຍ ບິດຄອຍ (Bitcoin) ຖືກສ້າງຂຶ້ນມາ ໂດຍການນຳໃຊ້ ເຕັກໂນໂລຊີ Blockchain, ແລະ ໃນອີກມຸມໜຶ່ງ ເຮົາກໍສາມາດສ້າງລະບົບຕ່າງໆ ທີ່ບໍ່ກ່ຽວຂ້ອງກັບ ບິດຄອຍ (Bitcoin) ໂດຍການນຳໃຊ້ ເຕັກໂນໂລຊີ Blockchain ໄດ້ເຊັ່ນດຽວກັນ.
ຖ້າປຽບທຽບກັບ Blockchain ຄືກັບ ປັກໄຟ ເຮົາກໍສາມາດ ເອົາລະບົບປັກໄຟ ໄປຂັບເຄື່ອນລະບົບ ເຄື່ອງໃຊ້ໄຟຟ້າອື່ນໆໄດ້ ອີກຫຼາຍຢ່າງ ເຊັ່ນ: ພັດລົມ, ໂທລະພາບ ສິ່ງເຫຼົ່ານີ້ ປຽບເໝືອນ ຜະລິດຕະພັນ ຫຼື ການບໍລິການ ທີ່ນອນຢູ່ໃນ Blockchain. ດັ່ງນັ້ນ Blockchain ຈຶ່ງສາມາດ ຮອງຮັບ ໄດ້ຫຼາຍລະບົບ ບໍ່ຈຳເປັນຕ້ອງແມ່ນ ດ້ານການເງິນພຽງຢ່າງດຽວ.
ການບັນທຶກຂໍ້ມູນ ຂອງ ລະບົບ Blockchain ແມ່ນ ຂໍ້ມູນຈະເກັບໃນຮູບແບບ ເປັນກ້ອນໆ ແລະ ນຳມາລຽງຕໍ່ກັນ ຄືກັບ ໂຊ່ ໂດຍໃຊ້ວິທີການເຂົ້າລະຫັດຂໍ້ມູນ ທາງຄອມພິວເຕີ ເພື່ອຄວາມປອດໄພ ແລ້ວສົ່ງກະຈາຍຂໍ້ມູນໄປເກັບໄວ້ ໃນຄອມພິວເຕີທຸກໜ່ວຍ ທີ່ຢູ່ໃນລະບົບເຄືອຂ່າຍດຽວກັນ.
ການຂຸດຄົ້ນ ບິດຄອຍ (Bitcoin)
ແມ່ນການນຳໃຊ້ລະບົບຄອມພິວເຕີ ເຂົ້າໄປຊ່ວຍໃນການຄິດໄລ່ແກ້ໂຈດທາງຄະນິດສາດ ເພື່ອຫາຜົນລັບຂອງໂຈດ ທີ່ລະບົບຕັ້ງຂຶ້ນ ເພື່ອໃຊ້ໃນການຢືນຢັນຄວາມຖືກຕ້ອງ ໃນການເຮັດທຸລະກຳຕ່າງໆໃນລະບົບ Blockchain. ຫຼື ເວົ້າອີກຢ່າງໜຶ່ງວ່າ ແມ່ນຜູ້ຢືນຢັນຄວາມຖືກຕ້ອງ ພາຍໃນລະບົບ Blockchain.
ສ່ວນຫຼາຍ ຜູ້ທີ່ຂຸດຄົ້ນ ບິດຄອຍ (Bitcoin) ໃນທົ່ວໄປ ເຂົາຈະເອີ້ນວ່າ Miner. ການເຮັດວຽກຂອງ Miner ກໍຄື ໃນເວລາ ມີການເຮັດທຸລະກຳ ພາຍໃນລະບົບ Blockchain ເກີດຂຶ້ນ, ຂໍ້ມູນການເຮັດທຸລະກຳ ຈະບໍ່ຖືກຂຽນລົງໃນລະບົບເທື່ອ ເນື່ອງຈາກ ຂໍ້ມູນດັ່ງກ່າວ ຍັງບໍ່ໄດ້ຮັບການຢືນຢັນ ຄວາມຖືກຕ້ອງ, ລະບົບ Blockchain ຈະຂຽນຂໍ້ມູນບັນທຶກລົງໄດ້ນັ້ນ ຂໍ້ມູນດັ່ງກ່າວຕ້ອງຜ່ານການຢືນຢັນຂໍ້ມູນກ່ອນ ຈາກຄົນໃນລະບົບ ກໍຄື Miner ຫຼາຍກ່ວາ 51% ຈຶ່ງຈະສາມາດ ບັນທຶກຂໍ້ມູນ ແລະ ກະຈາຍຂໍ້ມູນ ໄປຫາທຸກຄົນໃນລະບົບໄດ້.
ການຂຸດຄົ້ນ ບິດຄອຍ (Bitcoin) ຈຶ່ງເປັນການປະກາດວ່າ ຕົນເອງ ເປັນຜູ້ຢືນຢັນ ຄວາມຖືກຕ້ອງ ໃນລະບົບ ເພື່ອ ແຂ່ງຂັນກັນ ຢືນຢັນ ຄວາມຖືກຕ້ອງ ໃຫ້ກັບ ການເຮັດທຸລະກຳຕ່າງໆ ທົ່ວໂລກໃນລະບົບ Blockchain ທີ່ໃຊ້ ບິດຄອຍ (Bitcoin) ເປັນການບໍລິການ.
ການທີ່ເປັນ Miner ແມ່ນຕ້ອງນຳໃຊ້ ລະບົບຄອມພິວເຕີ ສະເພາະ ເພື່ອເຮັດການຄິດໄລ່ ແກ້ໂຈດ ທີ່ລະບົບ ສ້າງຂຶ້ນ ໃຊ້ໄວ້ຢືນຢັນຄວາມຖືກຕ້ອງ ມັນຈຶ່ງເຮັດໃຫ້ ມີການນຳໃຊ້ ພະລັງງານໄຟຟ້າ ຢ່າງຫຼວງຫຼາຍໃນລະບົບຄອມພິວເຕີ ເພື່ອປະມວນຜົນ ຫາຜົນລັບ ຂອງໂຈດ ທີ່ລະບົບສ້າງຂຶ້ນ. ເຊິ່ງເອີ້ນ ການເຮັດວຽກນີ້ວ່າ: Proof of Work (ຕົວພິສູດວ່າ ໃຊ້ ພະລັງງານ ໃນການເຮັດວຽກ).
ການແຂ່ງຂັນກັນຢືນຢັນ ແມ່ນມີ ທັງໄດ້ ແລະ ເສຍ, ເພາະວ່າ ເຮົາຕ້ອງໄດ້ແຂ່ງຂັນກັນ ຢືນຢັນຄວາມຖືກຕ້ອງ ກັບຄົນທົ່ວໂລກ ທີ່ເຂົາເຮັດ ຂຸດຄົ້ນ ບິດຄອຍ (Bitcoin) ຖ້າເຮົາແກ້ໂຈດໄດ້ໄວ (ກໍຄືການນຳໃຊ້ ລະບົບຄອມພິວເຕີ ຫຼາຍໜ່ວຍ ທີ່ມີການປະມວນຜົນ ສູງ ແລະ ໄວ) ກໍຈະໄດ້ຮັບຜົນຕອບແທນ, ຖ້າເຮົາແກ້ໂຈດໄດ້ຊ້າ ບໍ່ທັນຄົນອື່ນ ກໍຈະບໍ່ໄດ້ຮັບຜົນຕອບແທນຫຍັງ ເສຍຄ່າໄຟຟ້າໄປ ລ້າໆ.
ຜົນຕອບແທນສຳລັບ ຜູ້ເປັນ Miner: ຖ້າບໍ່ມີຜົນຕອບແທນ ຫຼື ຜົນໄດ້ຮັບ ກໍຈະບໍ່ມີການ ການຂຸດຄົ້ນ ບິດຄອຍ (Bitcoin) ເກີດຂຶ້ນ. ຜົນຕອບແທນທີ່ທາງ Miner ຈະໄດ້ຮັບແມ່ນ ຄ່າທຳນຽມການເຮັດທຸລະກຳນັ້ນໆ (Transaction fee) ເປັນເງິນລາງວັນໃຫ້ ກໍຄື: ຈຳນວນເງິນ ບິດຄອຍ (Bitcoin).
ຂໍ້ມູນເພີ່ມຕື່ມ:
-
ຊັບສິນດິຈິຕ໋ອນ (Digital Asset): ແມ່ນໜ່ວຍຂໍ້ມູນເອເລັກໂຕຣນິກ ທີ່ເປັນສິ່ງທີ່ມີມູນຄ່າ ສາມາດເປັນສື່ກາງໃນການແລກປ່ຽນສິນຄ້າ ແລະ ການບໍລິການໄດ້ ເຊິ່ງ ຊັບສິນດິຈິຕ໋ອນ ປະກອບມີ: ຄຣິບໂຕເຄີເຣັນຊີ (Crypto currency) ແລະ ໂທເຄນດິຈິຕ໋ອນ (Token Digital).
-
ຄຣິບໂຕເຄີເຣັນຊີ (Crypto currency): ແມ່ນ ສະກຸນເງິນທີ່ຖືກເຂົ້າລະຫັດ, ບໍ່ມີຕົວຕົນ, ບໍ່ສາມາດຈັບບາຍໄດ້ ແຕ່ເຮັດວຽກເທິງລະບົບຄອມພິວເຕີ ເພື່ອເປັນສື່ກາງໃນການແລກປ່ຽນຊື້ຂາຍ ສິນຄ້າ ແລະ ການບໍລິການ ເຊັ່ນ: Bitcoin, Ripple, Ethereum, Litecoin.
-
ໂທເຄັນດິຈິຕ໋ອນ (Token Digital): ແມ່ນໜ່ວຍຂໍ້ມູນເອເລັກໂຕຣນິກທີ່ຖືກສ້າງຂຶ້ນ ເພື່ອກຳນົດສິດໃນການເຂົ້າຮ່ວມ ລົງທຶນ ເຊັ່ນ: ສິດໃນສ່ວນແບ່ງລາຍຮັບ ຜົນກຳໄລ ຈາກການລົງທຶນ ຊຶ່ງ ອອກ ແລະ ສະເໜີຂາຍ ຜ່ານຂະບວນການ Initial Coin Offering (ICO).
-
ກຸ່ມຂໍ້ມູນຜູກພັນ (Blockchain): ແມ່ນການເກັບຂໍ້ມູນຮູບແບບໜຶ່ງ ທີ່ບໍ່ມີສູນກາງຂອງຂໍ້ມູນ ເພື່ອຊ່ວຍໃນການບັນທຶກ, ກວດສອບ ແລະ ຕິດຕາມຂໍ້ມູນຕ່າງໆ ແບບເປີດເຜີຍ ທີ່ທຸກຄົນສາມາດເຂົ້າເຖິງ ແລະ ຮັບຂໍ້ມູນຊຸດດຽວກັນ, ການບັນທຶກຂໍ້ມູນຈະເກັບໃນຮູບແບບ ເປັນກ້ອນໆ ແລະ ນຳມາລຽງຕໍ່ກັນ ຄືກັບ ໂຊ່ ໂດຍໃຊ້ວິທີການເຂົ້າລະຫັດຂໍ້ມູນທາງຄອມພິວເຕີ ເພື່ອຄວາມປອດໄພ ແລ້ວສົ່ງກະຈາຍຂໍ້ມູນໄປເກັບໄວ້ ໃນຄອມພິວເຕີທຸກໜ່ວຍ ທີ່ຢູ່ໃນລະບົບເຄືອຂ່າຍດຽວກັນ.