640
ຄວາມສະຫຼາດ ແມ່ນ ຄວາມສາມາດ ໃນການຮຽນຮູ້ໄວ, ຄິດໄວ, ເຂົ້າໃຈໄວ ແລະ ຈື່ຈໍາ ໄດ້ຢ່າງຖືກຕ້ອງ ຊຶ່ງໄດ້ມາຈາກ ການເຮັດວຽກ ຂອງສະໝອງ ດັ່ງນັ້ນ, ຖ້າທ່ານຢາກ ໃຫ້ລູກເປັນ ຄົນສະຫຼາດ ຈຶ່ງຈໍາເປັນຕ້ອງ ໃສ່ໃຈ ໃນການພັດທະນາ ສະໝອງຂອງລູກ.
ການກຽມຄວາມພ້ອມ ໃນແຕ່ລະໄລຍະ ຂອງການຖືພາ (40 ອາທິດ) ຖືວ່າ ເປັນໄລຍະທີ່ມີ ຄວາມໝາຍສໍາຄັນທີ່ສຸດ ຕໍ່ພັດທະນາການ ຂອງລູກ ໂດຍສະເພາະ ການພັດທະນາ ສັກກາຍະພາບ ສະໝອງ ຂອງລູກ ເພາະການພັດທະນາການ ສະໝອງ ຂອງລູກນ້ອຍ ສາມາດຮຽນຮູ້ ຕັ້ງແຕ່ ຢູ່ໃນທ້ອງ ໂດຍໜຶ່ງ ໃນປັດໄຈສໍາຄັນ ທີ່ມີຜົນຕໍ່ ການພັດທະນາການ ສະໝອງ ຂອງລູກນ້ອຍ ຕັ້ງແຕ່ຢູ່ໃນທ້ອງ ກໍຄື: ອາຫານ ທີ່ແມ່ກິນ ໃນແຕ່ລະຄາບ.
ແມ່ຖືພາ ຈຶ່ງຄວນໄດ້ຮັບ ໂປຼຕີນ (ນົມ, ໄຂ່, ຊີ້ນ, ປາ… ແລະ ສານໂຟເລດ (ຜັກ, ໝາກໄມ້, ທັນຍາພືດ, ຕັບ…) ເພີ່ມຫຼາຍຂຶ້ນ ເພາະສານອາຫານ ທີ່ຢູ່ໃນໂປຼຕີນ ຈະຊ່ວຍເສີມສ້າງ ສ່ວນຕ່າງໆ ຂອງຮ່າງກາຍ ໃຫ້ເຕີບໃຫຍ່ ຂະຫຍາຍຕົວ ແລະ ຍັງເພີ່ມຈໍານວນ ຈຸລັງສະໝອງ. ໃນເວລາດຽວກັນ ສານໂຟເລດ ມີໜ້າທີ່ສໍາຄັນ ໃນການສ້າງ ຫຼອດປະສາດ ແລະ ສະໝອງ ທີ່ສົມບູນ ຂອງເດັກໃນທ້ອງ ລວມທັງ ມີໜ້າທີ່ສໍາຄັນ ໃນຂະບວນການ ສ້າງສານພັນທຸກໍາ ຫຼື ດີເອັນເອ (DNA) ແລະ ຈຸລັງຕ່າງໆ ຂອງຮ່າງກາຍ ເມື່ອແມ່ຖືພາ, ຮ່າງກາຍແມ່ ຕ້ອງການ ສານໂຟເລດ ໃນປະລິມານທີ່ຫຼາຍທີ່ສຸດ ຈາກປົກກະຕິແມ່ນ ຮ່າງກາຍຕ້ອງການ ພຽງ 500 ໄມໂຄກຼາມຕໍ່ມື້ ຫຼາຍກວ່າປົກກະຕິ 1 ທົບ ເມື່ອຖືພາ ຄວນເພີ່ມເປັນ 600-1,000 ໄມໂຄກຼາມຕໍ່ມື້ ເພື່ອໃຫ້ລູກ ທີ່ຢູ່ໃນທ້ອງ ຂະຫຍາຍຕົວ ແລະ ສ້າງເມັດເລືອດ ໃຫ້ຫຼາຍທີ່ສຸດ ໃນໄລຍະຖືພາ ລວມທັງຫຼຸດ ຄວາມສ່ຽງ ຂອງການພິການ ທາງສະໝອງ ຂອງເດັກ ເຊັ່ນ: ພາວະຫຼອດປະສາດບໍ່ປິດ, ປາກແຫວ່ງ ເພດານໂຫວ່ ແລະ ພະຍາດຫົວໃຈ ພິການແຕ່ກໍາເນີດ ເຫຼົ່ານີ້ເປັນຕົ້ນ.
ນອກຈາກ ການເບິ່ງແຍງລູກ ໃນທ້ອງ ດ້ວຍສານອາຫານທີ່ດີ ມີປະໂຫຍດແລ້ວ ແມ່ຖືພາ ແລະ ສາມີ ຍັງສາມາດ ຊ່ວຍກະຕຸ້ນ ພັດທະນາການ ທາງສະໝອງ ຂອງລູກ ໄດ້ຕັ້ງແຕ່ ເລີ່ມຖືພາ ຜ່ານການກະຕຸ້ນ ປະສາດ ສຳຜັດທັງ 5.
-
ໃນໄຕມາດ 3 ເດືອນທໍາອິດ ຂອງການ ຖືພາ ລູກຍັງເປັນ ໂຕອ່ອນຢູ່ ແຕ່ສາມາດ ເລີ່ມຮັບຮູ້ ປະສາດສໍາຜັດທາງກາຍໄດ້, ເມື່ອ ອາຍຸ 2 ເດືອນ ພໍ່ ແລະ ແມ່ ສາມາດ ກະຕຸ້ນສໍາຜັດ ລູກນ້ອຍໄດ້ ໂດຍການລູບ ຫຼື ຕົບໜ້າທ້ອງຄ່ອຍໆ ແລະ ລົມກັບລູກ ດ້ວຍອາລົມ ທີ່ສົດໃສ ເມື່ອແມ່ ມີຄວາມສຸກ ກໍຈະຫຼັ່ງສານ ແຫ່ງຄວາມສຸກ (ເອັນໂດຼຄຟີນ) ແລະ ສົ່ງຜ່ານ ໄປຫາລູກ ໃນທ້ອງ ເຮັດໃຫ້ລູກ ຂະຫຍາຍຕົວ ແລະ ອາລົມດີ.
-
ເມື່ອກ້າວເຂົ້າສູ່ ໄຕມາດທີ ສອງ ພະລັງວິເສດ ທີ່ມາຈາກ ແມ່ ແລະ ພໍ່ ຄື ການລົມ, ເລົ່ານິທານ, ຮ້ອງເພງ ຫຼື ເປີດເພງ ໃຫ້ລູກຟັງ ເພື່ອກະຕຸ້ນ ພັດທະນາການ ການໄດ້ຍິນ ໂດຍໃນໄລຍະ ເດືອນທີ 6 ຫູຂອງລູກ ຈະເລີ່ມຮັບຟັງໄດ້ແຈ້ງ, ການລົມກັບ ລູກ ຕັ້ງແຕ່ ຢູ່ໃນທ້ອງ ນອກຈາກຈະເກີດ ເປັນຄວາມຮັກ, ຄວາມຜູກພັນ ແລະ ເປັນການ ສ້າງຄວາມສຳພັນ ລະຫວ່າງພໍ່-ແມ່-ລູກ ໄດ້ຜົນດີແລ້ວ ຍັງເປັນການ ເສີມສ້າງ ພັດທະນາການ ດ້ານການໄດ້ຍິນສຽງ ແລະ ອາລົມ ຂອງລູກນໍາອີກ.
-
ສໍາລັບ ໄລຍະ ໄຕມາດສຸດທ້າຍ ລູກນ້ອຍ ໄດ້ຮັບການພັດທະນາທັງ ການຮັບລົດຊາດ, ການເບິ່ງເຫັນ ແລະ ການຮັບກິ່ນ ໃນເດືອນທີ 7 ເດັກໃນທ້ອງ ຈະສາມາດ ຮັບຮູ້ລົດຊາດ ຈາກການ ກືນນໍ້າຄາວປາ ແລະ ອາຫານ ທີ່ແມ່ ກິນລົງໄປ ໃນກໍລະນີ ທີ່ແມ່ມັກກິນ ລົດຫວານ ລູກກໍຈະມັກ ກິນຫວານ ໃນເວລາ ທີ່ເກີດມາ ແລະ ໃນໄລຍະນີ້ ລູກຈະມືນຕາ ຮັບຮູ້ແສງ, ສະໝອງ ສາມາດຕອບຄືນ ດ້ວຍການດິ້ນ ຊຶ່ງແມ່ ສາມາດຫຼິ້ນກັບ ລູກນ້ອຍ ໂດຍການໃຊ້ ໄຟສາຍ ສ່ອງຄ່ອຍໆ ເພື່ອໃຫ້ແສງສອດເຂົ້າ ໜ້າທ້ອງ ໄປຫາ ນໍ້າຄາວປາ ເຮັດໃຫ້ລູກ ຮູ້ຄວາມແຕກຕ່າງ ຂອງຄວາມມືດ ແລະ ແຈ້ງໄດ້, ເມື່ອອາຍຸ 9 ເດືອນ ປະສາດສໍາຜັດ ດ້ານການໄດ້ກິ່ນ ຈະເລີ່ມເຮັດວຽກ, ການດົມກິ່ນ ຫອມອ່ອນໆ ຈະເຮັດໃຫ້ ແມ່ຖືພາ ຮູ້ສຶກຜ່ອນຄາຍ, ສະບາຍຕົວ ແລະ ຍັງສາມາດ ກະຕຸ້ນການຮັບ ຮູ້ກິ່ນຂອງ ລູກໄດ້ດີອີກດ້ວຍ.